Argentina yığmasının yarımmüdafiəçisi Sami Kedira və İspaniyanın gənclər yığmasının üzvü Serxio Kanalesdən sonra Madrid “Real”ı yay transfer dönəmində üçüncü keçidini rəsmiləşdirib. Belə ki, Almaniya yığmasının heyətində dünya çempionatında parlaq çıxışı ilə diqqət çəkən Sami Kedira “kral klubu” ilə anlaşıb. Hələ mundialın gedişindən bu futbolçu ilə maraqlanan “Real”, nəhayət ki, onun klubu “Ştutqart”la ortaq məxrəcə gələ bilib. “Ştutqart”ın onu satmağa razılıq verməsinin əsas səbəbi Kediranın klubla müqavilə müddətinin gələn ilə qədər olması idi. 23 yaşlı stopper “Ştutqart”da qalsaydı, gələn ilin yayında azad agent kimi istədiyi komandaya keçə biləcəkdi. Almanlar isə onun gedişindən gəlir əldə etmək istəyirdilər. Bu səbəbdən də “Real”ın 10 milyon avroluq təklifinə “hə” cavabı verilib. Dünən Madridə gedərək yeni klubunun bazasında olan Kedira yaxın günlərdə rəsmi müqaviləyə qol çəkəcək.

Əlavə edək ki, dünən gecə saatlarında “Real” “Xetafe”nin yarımmüdafiəçisi Pedro Leonun keçidini də həll edib. Gənc futbolçu bu gün “kral klubu” ilə 6 illik müqavilə bağlayacaq. Bu keçid “Real”a 10 milyon avroya başa gəlib.